Arohatia te Reo

24 July 2012

Nau mai, haere mai! No nanahi nei (23 Hongongoi) i timata ai Te Wiki o Te Reo Maori, ko tona kaupapa i tenei tau ko Arohatia te Reo, ara, 'kia aroha nui ki te reo Maori?.

Kapa haka group

Kapa haka group

 E ai ki a Ameriai Kiriwera, Te Tumuaki o te Tari Māori o Wellington East Girls', ko te reo te tūāpapa o ngā ahurea katoa, ko tōna tūmanako ka kaha ake te whakamahia o te reo.

"Ko tōku reo, tōku whakaohonga," te kī a Ameriai.

"Ki a au nei, kia kaha te whakamahia ia rā, ahakoa he mihi noa iho pea, he pai ake tērā i te kotahi wiki noa iho i te tau. Kua kitea e te nuinga, i ako ngā Māori ki te kōrero Ingarihi, nō reira he take pea tērā kia tahuri ngā tāngata kōrero Ingarihi ki te ako i reo Māori."

Ka tū Ngā Taiohi o te Rāwhiti - te kotahitanga o ngā rōpū kapa haka mai i ngā kāreti o Wellington East Girls', me Rongotai - āpōpō ki Te Whare Toi i Civic Square (25 Hōngongoi) mai i te 12.30pm - 1.30pm.

Ka rongo koe i ngā kōrero whakaihiihi a ngā ākonga, i tukuna ai e rātou i te whakataetae ā-rohe o Ngā Manu Kōrero mai i Te Whanganui-ā-Tara ki Ōtaki. Ka tū e rua o ngā kōtiro, a Rangimarie Teautama me a Wanaka Noanoa i te whakataetae ā-motu kura tuarua o Ngā Manu Kōrero ki Whakatū hei te Mahuru.

E kōrero ana a Rangimarie mō te whakapono, me te whakawhirinaki a te tangata ki a ia anō.

"Kei te hiahia haere au ki te kura toi whakaari, he uaua taku kōkiritanga i tērā," tā Rangimārie. 

"Ki a au nei, he nui tonu ngā tāngata Māori, Moana Nui a Kiwa hoki kāore i te whai i tā rātou iti kahurangi, he kore nō rātou e whakapono ka taea e rātou. Kei a koe te tikanga mēnā e whakapono ana koe ki a koe anō. Te tūmanako, mā taku kauhau e whakaawe, e whakatenatena anō i ētahi atu".

He pai ake te kanohi ki te kanohi i te Facebook te kaupapa o te kauhau a Wanaka.

"He pai ake te kanohi ki te kanohi mō te whakawhitiwhiti kōrero," e ai ki a Wanaka.

"Nui noa ake te hononga ā-tinana, ā-wairua hoki. Kia ora tonu ai te ahurea ko te kanohi ki te kanohi tonu te mahi tino pai rawa atu".

E ai ki te Kaiārahi Toi, Ahurea hoki o te Kaunihera, a Ray Ahipene-Mercer, he whānui, he hohonu hoki te ahurea me ngā kōrero tuku iho a Te Whanganui-ā-Tara, ka mutu he ngāwari ake te hono ki ngā pakiwaitara me ngā tāngata mēnā kua ako koe i te reo Māori, ahakoa paku noa.

"Mēnā he ngāwari ki a koe ngā kōrero pēnā i te 'Kia Ora', i te 'Tēnā Koe' rānei he āwhina tēnā ki te waihanga hononga," e ai ki a Cr Ahipene-Mercer.

"Ko ngā tāngata i ako i te reo Māori e mōhio ana ahau, he rawe ki a rātou, tae atu rā ki a au anō hoki."